जातिय राज्यको विरोधमा ब्राम्हणहरुको प्रदर्शन

जातीय राज्यको विरोध गर्दै ब्राम्हण समाज नेपालले आज पोखरामा वृहत सद्भाव र्‍याली प्रर्दशन गरेको छ ।

जातीय विभेद, जातीय राज्य, जातीय आरक्षण र राष्ट्रिय विखण्डनका विरुद्ध जातीय सद्भाव र राष्ट्रिय एकताको सन्देश दिने उद्देश्य सहित ब्राम्हण समाज नेपालले सद्भाव र्‍याली प्रर्दशन तथा सभाको आयोजना गरेको हो । पृथ्वीचोकबाट निस्केको सद्भावर्‍याली, नयां बजार, चिप्लेढुंगामा पुगेर सभामा परिणत भएको थियो ।

र्‍यालीपछिको  सभामा बोल्दै समाजका केन्द्रीय अध्यक्ष नारायणप्रसाद अधिकारीले जातीय राज्यले सदियौंदेखि रहदैं आएको सद्भाव भडकिने खतरा रहेको भन्दै,  शासकहरुलाई खबरदारी गर्न समाज अगाडि बढेको  बताउनुभयो ।

सदभाव र्‍यालीमा कास्की जिल्लाका विभिन्न गाविसबाट आएका हजारौ ब्राम्हण समुदायको उपस्थिति रहेको थियो । र्‍यालीमा सहभागी ब्राम्हणहरुले जातीय आरक्षणको आधारमा देश बिभाजन गर्दा राष्ट्रिय अखण्डतामा आंच आउने भन्दै राष्ट्रिय एकताका पक्षमा नाराबाजी समेत गरेका थिए । र्‍यालीमा उनीहरुले भजनकीर्तन गर्नुका साथै ब्राम्हण समुदायका बिभिन्न झांकी समेत प्रर्दशन गरेका थिए ।