स्पेसटाइमका अध्यक्ष जमिम साहको हत्या

अपराधीहरुले गोली प्रहार गरी स्पेसटाइम नेटवर्क प्रालिका अध्यक्ष जमिम साहको हत्या गरेको छ ।

राजधानीको लाजिम्पाटस्थित फ्रान्सेली दूताबास नजिक आज आइतबार अपरान्ह मोटरसाइकलमा आएका दुइ जनाले साह माथि गोली चलाएका थिए ।

अपराधीहरुले कारमा सवार साहमाथि गोली चलाएका थिए । गोली प्रहारपछि ती दुबै जना बा १५ प ८७३३ नम्बरको मोटरसाइकलमा महाराजगन्जतर्फ लागेको प्रहरी जनाएको छ ।
साथमा रहेका साहका गाडी चालकको समेत खुट्टामा गोली लागेको छ ।

छातिमा गोली लागेका साहलाई उपचारका लागि महाराजगन्जस्थित शिक्षण अस्पतालमा लगिएकोमा उपचारकै क्रममा मृत्यु भएको प्रहरीले जनाएको छ । घटनापछि काठमाडौमा सशस्त्र र नेपाल प्रहरीले आफ्नो सक्रियता बढाएको छ ।

२४ घण्टा भित्र हत्यारा पक्राउ गर्न सरकारसंग माग

उता आजै नीजि टेलिभिजन सञ्चालकहरुको संस्था टेलिभिजन व्रोडकाष्टर्स नेपाल टी बी एन ले साहको हत्याबारे सत्य तथ्य पत्ता लगाई २४ घण्टा भित्र दोषीहरुलाई पक्राउ गरी कारवाही गर्न सरकारसंग माग गरेको छ । अध्यक्ष आर के मानन्धरले घटनाको भत्सर्ना गर्दै सञ्चार माध्यम सञ्चालकको सुरक्षामा गम्भिर हुन सरकारसंग आग्रह गर्नु भयो ।

नेपाल पत्रकार महासंघले आज एक विज्ञप्ति जारी गरी च्यानल नेपाल टेलिभिजनका अध्यक्ष शाहको हत्याबाट महासंघ स्तव्ध भएको जनाएको छ ।

विज्ञप्तिमा राजधानीको व्यस्त सडक र सुरक्षाका दृष्टिले अत्यन्त संवेदनशील मानिएको क्षेत्रमा दिन दहाडै हत्या हुनुले देशको सुरक्षा व्यवस्था कति कमजोर रहेछ भन्ने प्रष्ट हुन्छ भनिएको छ । महासंघले घटनाको छानविन गरी दोषीलाई कानूनको कठघरामा ल्याउन सरकारसंग माग गरेको छ ।