कांग्रेससंग सहकार्य गर्नु पार्टीको कमजोरीः एà

संसदवाट प्रधानमन्त्री चयन गर्ने प्रणालीको पक्षमा  कांग्रेससंग सहकार्य गर्नु पार्टीको कमजोरी रहेको ठहर गर्दै नेकपा एमाले पुनः प्रधानमन्त्रीको प्रत्यक्ष चुनावको पक्षमा फर्किने निर्णयमा पुगेको छ ।  

सविधान सभा शासकीय स्वरुप निर्धारण समितिमा कांग्रेसको प्रस्तावमा सहमति जनाउदै एमालेले संसदले प्रधानमन्त्री चयन गर्ने प्रणालीको पक्षमा मतदान गरेको थियो ।  तर आजको केन्द्रिय कमिटी बैठकले पुन प्रधानमन्त्रीको प्रत्यक्ष निर्वाचन गर्नु पर्ने प्रणालीमा अडान राख्ने र सविधान सभामा पुन आफ्नो प्रस्ताव लैजाने निर्णर्य गरेको हो ।

पार्टीको नीति र आठौ महाधिवेशनको निर्णय बमोजिम प्रत्यक्ष निर्वाचित प्रधानमन्त्री पक्षमा अडान राख्ने र सहमति जुटाउन दलहरुसंग पहल गर्ने निर्णय भएको एक केन्द्रिय सदस्यले पत्रकारलाई जानकारी दिएका छन् । बैठकमा अध्यक्ष झलनाथ खनालले आफु संसदीय दलको नेताका हैसियतले आफूबाट समेत कमजोरी भएको भन्दै पुराना कुरा विर्सन र पार्टी नीतिमा अडिन रहन सदस्यहरुलाई आग्रह गर्नुभएको थियो ।  

यस्तै राज्यपुर्नसंरचनाबारे आयोग मार्फत टुङ्गो लगाउनुपर्ने निर्णय गरेको छ । एमालेले संघीय प्रदेशको संख्या, नाम र सिमा निर्धारणका लागि उच्चस्तरिय आयोग बनाउनु पर्ने निष्कर्ष निकालेको छ ।

राज्य पुनसंरचनाका विषयमा पार्टी भित्र विवाद बढेपछि एमालेले संघीय स्वरुपको छिनोफानो गर्ने जिम्मा प्रस्तावित उच्चस्तरिय आयोगलाई सुम्पनु पर्ने निष्कर्षमा पुगेको हो । तर जातीयताका आधारमा राज्य पुर्नसंरचना गर्न नहुने एमालेको निष्कर्ष छ ।