आमाको नाममा एउटा गीत
चिसो हुँदा खोकिलाको
ऊन ओडाउँथिन्
तातो भए आकाशको
जून ओडाउँथिन्
नपाएमा ऊनहरू
नआएमा जूनहरू
मेरी आमा मुस्कानमा
प्रभातको घाम
मिसाउँथिन।
मेरी आमा मुहारमा
हृदयको फूल फुलाउँथिन् ।
***
माटोलाई खेलाएर
सुन बनाउँथिन्
बाछा-पाठा स्याहारेर
धन कमाउँथिन्
बोटबिरुवा नभएमा
माया बाँड्न नपाएमा
मेरी आमा सुस्केरामा
गोधूलिको पीडा
बिसाउँथिन्।
मेरी आमा मुहारमा
हृदयको फूल फुलाउँथिन्….
***
पसिनाका सप्तकोशी
मन पराउँथिन्
नजरका दोषीलाई
बिगो भराउँथिन्
पानी बनी बग्नलाई
हावा बनी उड्नलाई
मेरी आमा जीवनमा
इन्द्रेणीको रङ्ग
मिसाउँथिन्।
मेरी आमा मुहारमा
हृदयको फूल फुलाउँथिन्….
मेरी आमा …….
One Comment
मीठो, मन छुने आमा सम्बन्धी कविता !