परिचय
म आफैँसँग
आफ्नो परिचय मागिरहेछु
चिन्न नसकेर आफैँलाई
आफैँबाट भागिरहेछु !
धेरै ठाउँमा देखेको छु
परिचय हुनेहरूलाई
चिन्न गाह्रो भएको
चिनिएकाहरू पनि
एकाएक नचिनिएको !
तिमीले आफ्नो परिचय दिइरहँदा
दिग्भ्रमित छु म
मैले चिनेको तिमी
र तिमीले परिचय दिएको तिमी बीचमा
म अन्यौल छु ।
मलाई मै माथि प्रश्न भइरहेछ
यतिखेर –
मेरै परिचय माथि संकटग्रस्त म
लाइनमा छु
परिचय दिनेहरूको
परिचय लिनेहरूको
भन- कसरी परिभाषित गरूँ म आफूलाई
के भनूँ ?
म को हुँ भनूँ ?
के हूँ भनूँ ?
भन-
के म आफूलाई बादल हूँ भनूँ ?
One Comment
त्यसैले त गाैतम बुद्दले एकै क्षण अगाडि उनलाई गालि गर्ने मानिस फर्केर आइ जब माफ माग्दै थियो नि न तिमी अगाडि गालि गर्ने व्यक्ति नै हाै न त्यो सुन्ने व्यक््त्ति म । को सँग किन माफि माग्दै छाै । क्षण क्षणमा मानिसको परिचय फरिएको हुन्छ। सुन्दर छ पस्काई।