गजल

अबत जिन्दगी अतालियो
अधिक तापले निसासियो

हुरहुरी बले प्रकल्पना
रहर बीचमै उजाडियो

हर उपासना भए वृथा
किन रिझेन दैव टाढियो

विरहले लुट्यो सबै खुसी
मलिन चेहरा उदाङ्गियो

भर र आड ती लडे सब
सबल थाम आज भाँच्चियो

दिनदिनै डसे प्रघातले
मन दुरुस्त छैन च्यातियो

दिन छँदै लुके प्रभाकर
नभ पयोधिबाट ढाकियो

नियति रत्तियो विनाशमा
सकसमा सधैँ बटारियो

lll SIS ISI S
छन्द:– मनोरमा
विश्राम:– ६ अक्षर